ខ្សែប្រយុទ្ធធ្លាក់កូដរបស់ Chelsea ម្នាក់នេះ កំពុងចង់ចាកចេញពីក្លឹបហើយ

អង់គ្លេស៖ ខ្សែប្រយុទ្ធធ្លាក់កូដកីឡាករ Timo Werner របស់ក្លឹបតោខៀវ Chelsea ត្រូវបានរាយការណ៍ថា កំពុងរំអុកចង់ចាកចេញពីក្លឹបហើយ។

ជាការពិតណាស់​ Timo Werner បានផ្លាស់ពីក្លឹប RB Leipzig មកចូលរួមជាមួយក្រុមតោខៀវ កាលពីឆ្នាំ ២០២០ ក្នុងតម្លៃខ្លួន ៥៣លានអឺរ៉ូ (ឬប្រមាណ ៦០លានដុល្លា)។ យ៉ាងណាមិញ រូបគេធ្លាប់តែជាកីឡាករដែលរកគ្រាប់បាល់បានច្រើនជាងគេកាលនៅលីគអាល្លឺម៉ង់ ក៏ប៉ុន្តែចាប់តាំងពីគេមកដល់កីឡដ្ឋាន Stamford Bridge មក គេបង្ហាញខ្លួនបាន ៨០ដង និង រកគ្រាប់បាល់បានតែ ១៩គ្រាប់ប៉ុណ្ណោះ។ លើសពីនេះទៅទៀត Timo Werner តែងតែត្រូវអ្នកគាំទ្ររិះគន់ជានិច្ច​ អំពីបញ្ហាដែលគេស៊ុតមិនងាយចូលទី ទោះបីជាបាល់នោះងាយនឹងស៊ុតចូលប៉ុណ្ណាក៏ដោយ។

យ៉ាងណាមិញ បើយោងទៅតាមសារកាសែត The Hard Tackle បានចុះផ្សាយឲ្យដឹងថា Werner ចង់ចាកចេញពីកីឡដ្ឋាន Stamford Bridge ខ្លាំងណាស់ នៅរដូវក្តៅខាងមុខនេះ ហើយទន្ទឹមនឹងនេះផងដែរ ក្លឹបក៏យល់ព្រមបើកទ្វារឲ្យគេដើរចេញ ប្រសិនបើក្លឹបណាហ៊ានចាយលុយ​ ៤០លានអឺរ៉ូ (ឬប្រមាណ ៤៤លានដុល្លា) ដើម្បីយកគេទៅរួមក្រុម៕