ទឹកលុយកប់ៗ! West Ham ប្រាប់ក្លឹបទាំងឡើយថា អ្នកណាហ៊ានឱ្យ ២០០លានដុល្លារ អាចយក Declan Rice បានភ្លាមៗ

អង់គ្លេស៖ នេះបើយោងតាម កាសែត Daily Mail អះអាងថាក្លឹបបាល់ទាត់ West Ham United នឹងទាមទារតម្លៃកំណត់ត្រាផ្ទេរកីឡាករអង់គ្លេសចំនួន ១៥០ លានផោន (ជិត ២០០លានដុល្លារ) ពីនរណាម្នាក់ដែលចង់ចុះហត្ថលេខាលើ Declan Rice នៅរដូវក្តៅ។

ក្រុមញញួរធំ West Ham ប្រឈមបាត់បង់ខ្សែបម្រើអន្តរជាតិអង់គ្លេសវ័យ ២៣ឆ្នាំរូបនេះ បន្ទាប់ពីគាត់បដិសេធមិនព្រមបន្តកុងត្រាថ្មី។ ប៉ុន្តែជាមួយនឹង Rice នៅសល់រយៈពេល ២ ឆ្នាំទៀតលើកិច្ចព្រមព្រៀងរបស់គាត់ ដូច្នេះ West Ham មានឱកាសទទួលបានចំនួនទឹកប្រាក់ដ៏ច្រើនពីការលក់គាត់ ហើយនឹងចង់បានតម្លៃផ្ទេរកំណត់ត្រា។

ក្លឹបបាល់ទាត់ West Ham United ប្តេជ្ញាថានឹងមិនអនុញ្ញាតឱ្យតារាវ័យក្មេង ពោពេញទៅដោយទេពកោសល្យចាកចេញនៅរដូវក្តៅនេះ សម្រាប់អ្វីតិចជាងការទាមទាររបស់ពួកគេ ១៥០ លានផោននោះទេ ខណៈមានព័ត៌មានថាក្លិបធំៗនៅជុំវិញពិភពលោកសុទ្ធសឹងតែតាមដានកីឡាករខាងលើ។

យ៉ាងណាមិញ ក្លឹបពីរបស់អង់គ្លេសបិសាចក្រហម Manchester United និងក្រុមតោខៀវ Chelsea ត្រូវបានគេរាយការណ៍ថា ចង់ចុះហត្ថលេខាជាមួយ Declan Rice នៅរដូវក្តៅ ប៉ុន្តែទន្ទឹមនឹងនេះនៅតែត្រូវគេមើលឃើញថា តើក្រុមទាំងពីរមានឆន្ទៈក្នុងការចំណាយប្រាក់ដ៏ច្រើនសន្ធឹកសន្ធាប់បែបនេះឬក៏អត់?